Generalitat de Catalunya

Era Accion de Govèrn

Pensar ordenadament, actuar rasonablament e atier calidament. Aguesti son es mots d’orde que, en debat d’investidura, didec que volie qu'orientèssen era accion deth Govèrn dera Generalitat. Pensar ordenadament entà conferir ua identitat de projècte as iniciatiues politiques e legislatiues des disparièrs departaments dera Administracion dera Generalitat. Actuar rasonablament entà desplegar-les damb ua accion de Govèrn solida, rigorosa e responsabla. E atier calidament pr'amor qu'eth nòste prumèr compromís, eth nòste compromís per Catalonha, ei un compromís damb era sua ciutadania, damb eth sòn progrès e, ath temps, damb era sua benestança.

Damb aguest dessenh, auem elaborat eth Plan de Govèrn 2007-2010, qu'ei un esturment de gestion publica que permet aufrir ua vision globau des èishi d’accion prioritaris deth Govèrn e des objectius que se’n deriven, en tot fomentar eth sòn caractèr transversau, en tot parlar mès de responsabilitats publiques que de competéncies, en tot orientar es politiques as preocupacions e pantes dera ciutadania e en tot assegurar qu'es nòsti interèssi collectius trapen un fidèu reflèxe en exercici der autogovèrn.

A trauèrs d’aguest Plan, era volentat d’Entenuda des grops politics que balhen supòrt parlamentari ath Govèrn, deven un acòrd robust entà dar sens e contunhitat ara accion publica. Se tracte d’arténher qu'es referéncies fondamentaus que legitimen er exercici governamentau trapen era sua rason d'èster en conjunt de rèptes politics, sociaus e economics de Catalonha, e en un renauiment constant dera aliança enter era ciutadania e era Generalitat entà artenher-les.

Justament per aguest motiu, eth Plan de Govèrn includís e enquadre questions clau entath futur deth nòste país com son era immigracion, er abitatge e era recèrca, ath delà d’autes que s’anaràn desplegant en temps coma es infrastructures o era emancipacion e era aucupacion juvenila, e manifèste era nòsta volentat d’afrontar-les a trauèrs d’acòrds politics transversaus.

Arténher qu'eth pluralisme politic s’incorpòre ara accion governamentau ei un signe de qualitat democratica e eficàcia, qu’er executiu dirigit peth president Maragall leguèc ara governacion deth nòste país. Eth Pacte Nacionau entara Educacion e er Acòrd Estrategic entara internacionalizacion, era qualitat dera aucupacion e era competitivitat dera economia an devengut un modèu de concertacion, qu'eth Govèrn d’aué saberà mantier, ampliar e esténer.

José Montilla
President dera Generalitat