Generalitat de Catalunya

Era Presidéncia de Catalonha

Er Estatut d'autonomia de Catalonha configure era Generalitat coma un organisme complèx integrat per tres institucions: eth Parlament, era Presidéncia dera Generalitat e eth Conselh Executiu o Govèrn.

Eth president ei elegit peth Parlament entre es sòs membres e nomenat peth rei e concentre dus tipes de foncions: representatives e governatives.

Foncions representatives

Eth president dera Generalitat a era mès nauta representacion dera Generalitat e era ordinària der Estat en Catalonha. Li correspon, tanben, mantier es relacions damb es autes institucions der Estat e eth rèste des comunitats autònomes, convocar es eleccions ath Parlament de Catalonha e nomenar es nauti cargues qu’es leis determinen.

Coma representant ordinari der Estat en Catalonha, promulgue en nòm deth rei es lleis de Catalonha.

Foncions governatives

Eth president forme part deth Conselh Executiu e ei qui la dirigís e la coordine, establint es directritzes generaus dera accion de govèrn. En aguest sentit, nomène es conselhèrs, convoque e presidís es reunions deth Govèrn e signe es decrets acordadi peth Conselh Executiu e ordène que se publiquen. Tanben pòt demanar que eth Parlament se reunisque en session extraordinària e, arribat eth cas, a de dissoler-lo o sollicitar que s'i celèbre un debat generau.

Eth president dera Generalitat tanben a de coordinar eth programa legislatiu deth Govèrn e era elaboracion de normes de caractèr generau, convocar e presidir es comissions deth Conselh Executiu e facilitar era informacion qu’eth Parlament sollicite ath Govèrn.